Статистика ВК сообщества "БЕЗ ТЕБЯ-СЕН ЧОГУНДА...IV"

Экии шупту.

19:00 чедир бир шак арткан. Чеди шакка чедир чем кылып ижер, оон от салып болбас, хоржок — имир дүжүп чорда дээрде ужуп турар бичии демир куштар көрүп кааптар. Отту ышталдыр база салбас, база көстү бээр. Дүрген чем, шайны хайындырар. Элдеп чүве, шай төнген. Кофе база чок. Чигир, дус, макарон, гречка, рис, тушенкалар шуут чедер. Картофельди суурдан ап алган бис, 5-6 шоодай. Шуут чедер.
Шай чокта ат чүве-дир мооңар. Адаптовиттер* шагда төнген.
Оон бир эживис бар, Эвенкиядан келген. Хадыңда чага дээр сарыг, дадарык демирге дөмей чүвени (ыяш мөөгүзү эвес) хоора тырткаш, одаг кыдыынга чаза кургаткаш изиг, хайнып турар хөнекте сугже киир каапкаш беш-алды минут хайындырар. Сарыг шай, кофе өңнүг апаар чүве-дир, билбес кижи мен. Ижерге кофе амданныг. Шуут шымбай. Ону ижип чоруп турувуста бистиң Тывада суурдан фронтуга дуза келген, шай-таакпы, конфет-чигир, уктар, шык салфеткалар, саваңнар дээш-ле баар. Четтирдивис, чонум! Кара баштыг чаптанчыг дуңмаларым сактып келгеш өөрээш карак чажы чайгаар бадар чорду... Чеди хире ама саазында дайында оолдарга дээш бир-ийи классчы уруглар, оолдар чуруктар чурааш чортупкан, хөрээвисте, чүрээвис дужунда шериг билет иштинде чылыг шыгжап чор бис, дуңмаларым. Дайын-чаа төнерге суурга барып бо-ла шериг хептиг баргаш силерге четкеш чүнү күзээр-дир силер, белектерден бээр бис! Бистиң дайынчы соруувусту көдүрүп чорууруңар дээш! Канчап билир, хары черге сөөк салза, чанывыста аргада орус эжимге чугаалап каан мен, ол силерге чеде бээрин аазан. Тывалардан чааскаан мен. Башка чүү-даа кирер диин. Демин чаа чанывыска снаряд кээп дүшкен, дөрт кижи ыш-биле барган. Ынчангаш айыыл секунда, минута санында. Чечня, Сирия дээрге маңаа көөрде херекчок апаар-дыр.
Кежээ, өшкен одаг кыдыынга оруп алгаш орарга кижи амытан чүнү-даа бодаар диин, чүү-даа башка кирер. Өрү көөрге бедик хадылар болгаш аяс сылдыстыг дээр. Сылдыс чүгүре бээрге шуптувустуң бүдүү күзеливис — бо мелегей дайын төнзүн — деп. Дөртелээн чугаалажып чыдар бис. Чана берзивиссе кым чүнү канчаар силер дээрге, бир кижи вахтаже чоруур мен дээн, бир кижи анаа үнүп аар мен деп, бир эживис кадайын, ажы-төлүн алгаш Сибирьже көжер мен деп. Менде чүү боор, келгеш таныш тыпкаш, өгленип-бадыланчып, салгал дамчыыр чаңгыс эр-даа, кыс-даа болза төлдүг болуп көрейн деп бодап чыттым. Эрткен чылын 55-че кирер дээримге киирбээн улус, ынчангаш соңгаар чоруй бардым, дораан киирип алдым. Ам 55-те хөй улус үнүп турар деп дыңнадым, дайын төнерге барып, шөлээм үезинде ынаар кирип алырын көрейн.
Бисте смартфон, телефоннар чок. Мону кызыгаарже (Россия) барып, тыл хандырылгазы кылып турар эрлерден дамчыттым, бо бөлүкче салыптар, ол-ла.

Хары черде төрээн Тывазын сагынган, тускайлаттынган шериг чолаачы-адыгжы эрден.
Чажыт үндүрери чугула, админ.
___________________________
*Адаптовит — шериглерниң хүнезин хавында чоруур сугга хоюдуп ижер юпи ышкаш бичии хапта чигирзиг чем.