Статистика ВК сообщества "Мин − Әсә!"

Бөгөн - Туғандар көнө.

Беҙ бит бер ҡарында яралғанбыҙ,
Бер әсәнең һөтөн имгәнбеҙ,
Бер икмәкте бүлеп ашағанбыҙ,
Бергә илап, бергә көлгәнбеҙ.

Бер туғандар бит беҙ! Бер оянан
Бер-бер артлы осоп сыҡҡанбыҙ,
Ҡайғыларҙы бергә уртаҡлашып,
Күҙ йәштәрен бергә йотҡанбыҙ.

Бөтәһе лә уртаҡ ине лә бит…
Нимә булды, апай-ағайҙар?
Һәр берегеҙ хәҙер үҙен генә
Башҡаларҙан өҫтөн һанайҙар…

Бер туғаның өсөн йән атыуҙы
Кәмһенеү тип уйлай ҡайһылар.
Юғалтмайыҡ, зинһар, туғандарҙы,
Бынан да ҙур ниндәй ҡайғы бар?!

Баш эймәйем тиеп күкрәк ҡағыу
Яратҡандар өсөн хас түгел,
Яратҡандар яһай тәүге аҙым,
Яратҡанда ғына саф күңел.

Хоҙай беҙҙе бергә булһын өсөн
Бер туғандар итеп яратҡан.
Мин яратам һеҙҙе, туғандарым!
Ниндәй булһағыҙ ҙа яратам!

[id37396802|Фирүзә Абдуллина]

Улым, улым, улҡайым һин,
Улҡайым, балаҡайым...
Йөрәгемдең иң түрендә,
Ҡояшым һин, айҡайым.

Күкрәгемә һине ҡосоп,
Йәнемә ләззәт алам.
Хоҙай һине ташламаһын,
Бәхетле булсы, балам.

Һәр көн һайын Хоҙайымдан,
Һиңә һаулыҡтар һорайым.
Һыҙылып таңдар атҡан саҡта,
Бәхеттәр генә юрайым.

Ғүмер юлың булһын оҙон,
Ҡайғылар урап уҙһын.
Йә, Хоҙайым, балаларым
Тәүфиҡлы булып үҫһен.

Хәлиҙә Әсхәҙуллина

Уйлағыҙ һуң!

Күптәр уйлай: "Бына рәхәт йәшәй,
Тибеп донъяларҙың артына:
Ирҙең ышығында, еңел эштә,
Аҡса услап тотоп, шат ҡына!"

Кеше эше һәр саҡ еңел инде!
Үҙеңдеке генә ҡатмарлы…
Зарланырлыҡ сәбәп һәр кем таба,
Һөйләмәйбеҙ генә аһ-зарҙы.

Ир ышығы – бары ышыҡ ҡына,
Терәүҙәре тағы ҡатын-ҡыҙ!
Күргәнегеҙ бармы ир-аттарҙың
Матур йәшәгәнен ҡатынһыҙ?

Аҡса тиһәң… Осранымы һеҙгә
“Аҡса етте!” - тигән кешеләр?
Булғанына риза булып ҡына
Йәшәйҙәр тик минең ишеләр!

Тибешергә мин маташам ғына –
Донъя тибә артҡа нығыраҡ!
Шуныһы бар: типкеләгән һайын
Кәүҙәм генә бары турыраҡ!

Уйлағыҙ һуң, әйҙә, рәхәтлектә
Иркәләнеп кенә йәшәй тип,
Хоҙай, бәлки, йөктө еңеләйтер,
Һеҙҙең уйлағанды ишетеп…

[id37396802|Фирүзә Абдуллина]

ҠЫҘЫМА

Ҡарайым да ҡыҙыма - йөрәк майым һыҙыла...
Бер аҙ ғына миһырбанлы, булсы яҙмыш, ҡыҙыма!
Мин дә һеҙҙең ғүмер буйы янығыҙҙа торалмам.
Ҡыҙ бәхете ирҙән була - ир бәхете бир, Аллам.
Иркә үҫкән ҡыҙымды - үҙемдән дә ҡыҙғанам,
ҡаҡмай-һуҡмай үҫтергәйнем, еңел яҙмыш бир, Аллам!
Кисәгеләй күҙ алдымда сәсең тарап үргәнем,
Эй, Хоҙайым, балаларым ҡайғы-хәсрәт күрмәһен!
Ҡарайым да ҡыҙыма - йөрәк майым һыҙыла...
Бер аҙ ғына миһырбанлы, булсы яҙмыш, ҡыҙыма?!.

Тәнзилә Йәнтилина

Рәхмәт

Ғүмеремдең төрлө сағы булды,
Уҡмашҡаны булды яҙ, ҡышым,
Көн менән төн алмашҡаны булды –
Төрлө кәртә ҡорҙо яҙмышым.

Ул ҡолата һуҡты – тороп баҫтым!
Ул үлтерҙе – ҡабат терелдем!
Иң ауырын бирҙе юғалтыуҙың,
Йәшәү ҡәҙерҙәрен мин белдем.

…Рәхмәт менән таңда күҙем асам,
Шөкөр итәм тапҡан малыма,
Шуға күрә бәхет һандуғасым
Һайрай ҡунып күңел талыма.

Шуға күрәм донъя матурлығын!
Беләм туған-дуҫтың ҡәҙерен!
Шуға һәр саҡ аяҙ күңел күгем,
Ошо хаҡта булыр нәҙерем.

Шөкөр – донъяларҙа йәшәп ятам,
Камил аңым, теүәл ағзалар,
Һулар һауам таҙа, һыуым – татлы,
Урап үтә, шөкөр, ҡазалар.

Риза булып йәшәү – үҙе бәхет,
Рәхмәт ишетеүе – һай, рәхәт!
Рәхмәтлемен бөгөн яҙмышыма,
Эй, Хоҙайым, һиңә мең рәхмәт!

[id37396802|Фирүзә Абдуллина]

Әсәйҙәргә ваҡытыбыҙ етмәй,
Ашығабыҙ, бөтмәй эшебеҙ,
Сит-яттарға ярҙам күрһәтәбеҙ,
Әсәй көтөр – ул үҙ кешебеҙ!

Беҙҙең өсөн тик ул янып-көйә,
Көтә тәмлекәстәр бешереп,
Һыҙланыуын беҙгә һиҙҙермәйсә,
Төндә эсә дарыу йәшереп.

Күп һөйләйбеҙ, ләкин иң кәрәкле,
Иң ҡәҙерле һүҙҙе әйтмәйбеҙ,
“Ҡабаланам, әсәй, хуш хәҙергә!” -
Яуап биргәнен дә көтмәйбеҙ.

Эстән генә доғаларын уҡып,
Йүгерә-атлай ҡала оҙатып,
Төн йоҡламай аҙаҡ беҙҙе уйлап,
Беҙ китәбеҙ шулай илатып.

Күп кәрәкме уға? Ул бит әсәй!
Сикәһенә терәп сикәне,
“Һин кәрәкһең, әсәй, һағынам,” - тип
Бер ҡосаҡлап уны үпһәңсе!

Ҡояш кеүек балҡыр әсә йөҙө,
Йөрәгенә килер еңеллек…
Ошо йөрәк әле типкән саҡта
Ашығайыҡ өйгә иң элек!

[id37396802|Фирүзә Абдуллина]

Имен йөрө.

Ултыр әле, балам, йәнәш,
Ҡосаҡлайым!
Ел-ямғырҙан, ҡазаларҙан
Ышыҡлайым.

Һөйлә әле хәлдәреңде,
Еңеләйер,
Доғаларым баш осоңа
Сатыр йәйер.

Һөйләмәһәң, һөйләмә, тик
Бул янымда,
Һинең өсөн борсолоуым
Аң - ҡанымда.

Бәхетһеҙмен тимә, балам –
Сәләмәтһең!
Яҡындарың бар яныңда –
Һин кәрәкһең!

Ҡара әле, был донъялар
Ниндәй матур!
Күрһәң ошо матурлыҡты,
Дәртең ҡайтыр.

Бер ҡосаҡлап яратайым
Әле, балам...
Имен йөрө! Һиңә бәхет
Теләп ҡалам.

[id37396802|Фирүзә Абдуллина]

Бөгөн Ҡыҙ балалар көнө билдәләнә икән.
Ҡыҙлыларҙы байрам менән!

Ҡыҙҙарымдың күҙҙәренә бағам да мин,
Йәшәүемдең мәғәнәһен табам да мин.
Йән-усаҡҡа өмөт өҫтәр ҡуҙҙарым да,
Был тормошта ҡанат ҡуйған ҡыҙҙарым да.

Ғүмеремдең үкенмәйем аҡҡанына,
Ҡояш ҡалҡып иртәгәсә батҡанына.
Йыуанысым, ҡыуанысым - ҡыҙҙарым да,
Ҡара төндә балҡып торған нурҙарым да.

Аҡланмаған өмөттәрҙе юғалтмайым,
Мин үҙемде һис ҡасан да йыуатмайым.
Ҡошсоҡтарым, өмөтөмдөң нурҙары ла,
Тормошомдоң иң моңло ла йырҙары ла.

Ынйыҡайҙар, һыйыналар ҡосағыма,
Мин бәхетле үҙем яҡҡан усағымда.
Бәхетте мин гел теләйем ҡыҙҙарыма,
Йөрәгемә ялҡын биргән ҡуҙҙарыма.

Фәнил Бүләков

Доғаларым - балам хаҡына

Әйтегеҙсе, бер мин генә шулай
Баш тартаммы алтын - көмөштән?
Урынына, Хоҙай, һаулыҡ, тәүфиҡ,
Бир балама иң ҙур өлөштән.

Ялтыр - йолтор сылбыр эленгәнсе,
Муйынымдан балам ҡосһон ул.
Күҙҙәрендә гәүһәр ише балҡып
Бәхет осҡондары боҫһон ул.

Зәһәр тундары ла бер тин тормай,
Донъялағы Әсә затына.
Шикле байлыҡтарға ҡыҙыҡмайым,
Доғаларым балам хаҡына.

[id35839146|Рәзилә Ырыҫҡужина]

«Сәсрәп китһен донъяһы!» - тип,
Ҡатын бөгөн йоҡланы.
Иртән һыйырын һауманы,
Хатта көтөү ҡыуманы.

Һөтһөҙ ҡалған ас быҙауҙар
Баҡырышты, туланы.
Туғыҙҙа торған иренә
Ҡайнар сәй ҙә булманы.

Ҡыҙҙың сәсе үрелмәне,
Йыйылманы йорт-ҡура.
Хатта бахыр тауыҡтар ҙа
Ас килеш бикле тора.

Ахрызаман еткән өйҙә:
Киткән кеүек йорт ҡото.
Ғүмергә бер тәүге тапҡыр
Йоҡо туйҙырған ҡатын.

(Гөлнур Ҡыуатова).